ПРИМИРЈЕ НА БЛИСКИОТ ИСТОК: Израел и Хамас по 11 дена ги запреа нападите
Објавено во: Свет 21 Мај, 2021
Примирје има на Блискиот Исток. Израел и Хамас по 11 дена ги запреа меѓусебните напади. Државниот секретар на САД, Ентони Блинкен, на Твитер најави дека деновиве ќе отиде во посета на Блискиот Исток.
Покрај САД, и Европската Унија го поздрави договорот за прекин на огнот во Газа после единаесет дена интензивно насилство. За Европската Унија само политичко решение може да доведе до траен мир во регионот.
Брисел им се заблагодари на земјите и организациите што придонесоа кон договорот за прекин на огнот: САД, ОН, Катар и Египет.
Израелскиот премиер Бенјамин Нетанјаху оцени денес, откако стапи на сила прекинот на огнот, дека израелската офанзива против палестинските оружени групи во појасот Газа, вклучувајќи го Хамас, била „исклучителен успех“. Прославата по прогласувањето на примирјето започна од двете страни, а Палестинците започнаа да се собираат во џамијата Ал Акса од раните утрински часови.