Работат во државна комисија, но два месеци не зеле плата
Објавено во: Економија 04 Мај, 2018
Вработените од Државната комисија за одлучување во втор степен во областа на инспекцискиот надзор и прекршочната постапка информираат дека два месеци не земале плата, во институцијата не се плаќаат сметките за струја, вода и другите режиски трошоци, а не се подмирени ниту обрските кон државата, затоа што претседателот и членовите од претходниот состав се разрешени, а на нивно место не се именувани други лица.
– Со разрешувањето на претседателот и членовите од претходниот состав на Државната комисија и неименувањето на нов состав на комисијата, вработените во стручната служба на комисијата веќе два месеци немаат земено плата и целокупната работа и функционирање на Државната комисија е во застој, со што се засегнати и граѓаните на Република Македонија. На претседателот и на членовите мандатот им престана на 19.03.2018 година со одлука на Собранието на Република Македонија. Најголем број од вработените имаат кредитни обврски спрема банките и застојот во исплатата на платата веќе два месеци, а можеби тоа ќе трае и повеќе месеци и ќе се одрази врз нивната економска состојба. Ова од причина што со неисплатената плата ќе има и неисплатена рата/рати за кои банките дополнително ќе пресметуваат затезна камата.
– Исто така и здравственото осигурување за сите вработени во Државната комисија истече на 30.04.2018 година и со тоа од 01.05.2018 година не може да се оствари правото на лекување и земање на лекови од аптеките на сметка на Фондот за здравствено осигурување, што предизвикува дополнителен трошок и проблем за сите вработени. Поголем дел од вработените секојдневно патуваат од Гостивар, Кочани, Тетово, Куманово, Илинден и во случај да не им се исплаќа редовно плата нема да бидат во можност да го финансираат својот превоз до Скопје и назад, се вели во писмото испратено до медиумите.
Вработените информираат и дека од Управата за јавни приходи добиле опомена поради неплатените придонеси од задолжително социјално осигурување, персонален данок и нето плата по поднесената МПИН пресметка во износ од 1.547.777,00 денари.