РЕГИСТАРОТ ЌЕ СЕ АЖУРИРА: Евидентирани 67 професионални онлајн медиуми
Објавено во: Македонија 18 Декември, 2019
Регистрирани се 67 професионални онлајн медиуми.
Регистарот на професионални онлајн медиуми, кој денеска е презентиран, има вкупно 67 членки. Тука влегуваат онлајн медиуми со транспарента сопственичка структура, кои се обврзуваат дека ќе ги почитуваат професионалните стандарди и ќе објавуваат информативни содржини.
Здружението на новинари на Македонија (ЗНМ) и Советот за етика во медиумите на Македонија (СЕММ) го презентираа регистерот, а кон процесот на креирање на регистарот се приклучи и Стопанската комора на Македонија. Целта на регистарот е читателите да знаат дека медиумите ги почитуваат стандардите и не шират лажни вести и дезинформации.
Ставот на ЗНМ и на СЕММ е дека саморегулацијата е најмоќно решение за поттикнување на професионалноста во медиумите, не само во сегашни околности, туку и на подолг рок. Доколку некој од членовите ги прекрши стандардите ќе биде избришан.
Веб-страницата на PROMEDI@ МК од 1 јануари 2020 година ќе стане целосно функционална и редовно ќе се ажурира со податоци за членките на регистарот.
Регистарот е направен според примери од странство и во консултација со новинарската, медиумската и бизнис-заедницата во државата.
Изработувањето на регистарот е според практиката во развиените демократски општества и Советот на Европа.