РЕВИЗОРСКИ ЦРВЕН КАРТОН - Без главен ревизор ниту може да работиме, ниту да земаме плата
Објавено во: Македонија 28 Ноември, 2019
Ревизорите здружено излегоа пред јавноста, со барање итно да се избере главен државен ревизор. Тие тврдат дека оваа институција е целосно блокирана, а тие не можат да си ја вршат својата работа, не можат ниту да земат плата, ниту да ги исплатат режиските трошоци.
Ова на јавноста и го порачаа околу 60 вработени во Државниот завод за ревизија, кој повеќе од две години е без директор.
„Доколку не дојде до брз итен избор на главен државен ревизор, ние се соочуваме со де факто законско престанување на нашето работење. Нема да можеме да ја реализираме тековната годишна програма за 2019 година. Не сме во можност да ги исплатиме нашите режиски трошоци, ќе останеме без струја и вода“, нагласи на заедничката прес конференција Мијалче Дургутов, ревизор за информирање и комуникација.
Тој нагласи дека оваа институција има доспеан долг од 1,5 милион денари и тужбени барања. Според него, по 4 октомври годинава сите извештаи на заводот не можат да се испратат на одговор до субјектите на ревизија, бидејќи нема кој да потпишува. Нагласи и дека изборите кои треба да се одржат идната година, согласно процедурата на работа, не може да се одржат ако нема ревизија на изборната кампања.
Инаку, од 54-те планирани ревизии, 12 се уште се во тек и треба да бидат завршени до крајот на годината. Досега се поднесени само 11 целосни извештаи, а останатите чекаат потпис од првиот ревизор.
А во СЈО била планирана ревизија и пред да излезат извештаите за доделување енормни бонуси на обвинителите. Но тоа не може да се спроведе без потпис од главниот државен ревизор.