СЕ Е ПОДГОТВЕНО ЗА ИСТОРИСКА СРЕДБА: Ким и Трамп се среќаваат во Ханој
Објавено во: Свет 26 Февруари, 2019
Севернокорејскиот лидер Ким Џонг Ун и американскиот претседател Доналд Трамп денес пристигнуваат во Ханој, престолнината на Виетнам, каде прв пат ќе се сретнат после осум месеци.
Како што пренесуваат светските агенции, Виетнам се подготвува денес да го дочека специјалниот воз на Ким на железничката станица Донг Данг, оддалечена четири километри од границата со Кина.
Од другата страна, Трамп полетал од Вашингтон и би требало вечерва по локално време да слета на меѓународниот аеродром Нои Баи.
Трамп претходно на Твитер обајви дека тргнал за Виетнам и порача дека се радува на „продуктивниот самит“ со севернокорејскиот лидер.
Пред поаѓањето, Трамп во Вашингтон рекол дека очекува „извонреден самит“.
Ким уште на 23 февруари тргнал од Пјонгјанг со воз во придружба на високи претставници и своите влијателни сестри, за да стигне на самитот закажан за 27 и 28 февруари, јави севернокорејската официјална агенција.
Како што е претходно објавено, возот на Ким ќе патува до границата со Виетнам до местото Донг Данг, од каде до Ханој ќе продолжи со кола, поради што локалните власти најавија затворање на патиштата.
Самитот во Ханој е прва средба на двајцата лидери по историската средба во Сингапур пред осум месеци, каде ветија дека ќе работат во правец на целосна денуклеризација на Корејскиот полуостров.