Се најавуваат помасовни протести: Ниската откупна цена ги зовре тутунарите
Објавено во: Економија 05 Декември, 2020
Ќе има ли масовни протести на тутунарите од утре? Најави стасаа од прилепските тутунари, а реакциите се поради ниската откупна цена. Иако официјално откупот не е почнат сепак дел од тутунарите го продаода својот тутун ама за значајно пониска цена од ланската. Сега килограм тутун се откупува за 150 до 165 денари за килограм, а минатата година цената беше 220 денари за килограм. Во вакви услови се бара субвенција за предадениот тутун.
Дел од тутунарите од струмичко и вчера се собраа да го изразат своето незадоволство. Откупувачите пак велат дека производителите им подметнуваат тутун со полош квалитет мешајќи го со повисоките класи.
Министерот за земјоделство шумарство и водостопанство Аријанид Хоџа вели дека проблемите се должат на Ковид кризата, но очекува да ситуацијата да се промени до крајот на откупот. Засега како решение кое државата го нуди на тутунарите е укинување на четвртата класа. Со ова се очекува да скокне просечната цена.
Засега се отворени само 4 од 10 откупни пункта. Откупени се близу 260 од вкупно 23.000 тони тутун. Лани просечната откупна цена достигна 220 денари по килограм.