Се „напумпа“ ли добивката на МЗТ Пумпи?

Добивај вести на Viber

МЗТ Пумпи АД Скопје во првото полугодие од 2017 оствари добивка по оданочување од нешто над 10 илјади евра со тоа што успеа за нијанса да ги зголеми вкупните приходи кои изнесуваат 1,1 милион евра. МЗТ Пумпи губат пазарно учество во Македонија каде продажбата им е намалена за 27% во споредба со периодот јануари-јуни 2016, но од друга страна пак ја зголемиле продажбата во странство за 15% со вкупни приходи од 927 илјади евра.

Оперативните расходи на МЗТ Пумпи во првите шест месеци од 2017 година изнесуваат 1,1 милион евра и бележат намалување за 5% во однос на 2016 година. Трошоците за вработените завземаат 27,23% и изнесуваат околу 300 илјади евра што е за нијанса помалку во однос на 2016 година.

„Позитивниот финансиски резултат е резултат на напорите на менаџментот  за максимално задоволување на потребите и очекувањата на купувачите и рационализација на трошоците на работење“ велат од МЗТ Пумпи АД Скопје. 

МЗТ Пумпи АД Скопје е компанија која се занимава со производство и монтажа на пумпи, турбини, хидраулична и еколошка опрема и компресори. Производство на други пумпи и компресори. Во последните три години немаат поделено дивиденда. Книговодствена вредност на акциите на МЗТ Пумпи АД Скопје за 2016 изнесуваше 4900 денари.