Се огласи Иванов по објавувањето на двата закони: Дали меѓународната заедница дозволува вакви преседани во своите држави?

Добивај вести на Viber

Претседателот на Македонија, Ѓорѓе Иванов, се огласи по објавувањето на Законот за употреба на јазиците и Законот за ратификација на Преспанскиот договор без негов потпис на указите во „Службен весник“, со тврдење дека СДСМ и ДУИ ја погазиле правната држава, а во меѓународната практика тоа било преседан.

„Доцна синоќа имавме можност да го видиме вистинското лице на владината коалиција на СДСМ и ДУИ која себеси се смета за проевропска.

Објавувањето на Законот за употреба на јазиците и на Законот за ратификација на спогодбата од Преспа во Службен весник без потпис на указ од Претседателот на Република Македонија се противуставни.

Со доставувањето на овие два закона во Службен весник е прекршен член 75 од Уставот на Република Македонија, додека објавувањето на законите е направено незаконски и претставува основа за кривично гонење.

Ова е момент кој ќе покаже дали во Република Македонија постои Уставен суд, дали функционира обвинителството, дали има независно судство и дали постои владеење на правото.

Се прашувам, дали високите претставници на меѓународната заедница, кои ја поддржуваат оваа владина коалиција, ќе се јават и ќе го поддржат овој начин на донесување на закони?

Дали ќе ги поддржат овие преседани, што носат несогледливи последици и штета по правото и правната држава и дали вакви преседани применуваат во сопствените држави?“, се вели во реакцијата на Иванов.

Претходно, директорот на ЈП Службен весник Мартин Костовски во изјава за Лидер вели дека не се чувствува одговорен што се објави Законот за употреба на јазиците во Службен весник, кој не беше потпишан од претседателот Ѓорѓе Иванов, туку доцна синоќа го потпиша претседателот на Собранието Талат Џафери.

- Иванов го прекрши Уставот со непотпишувањето, а не јас. Токму затоа не чувствувам никаква одговорност. Ние со фуснота дополнивме зошто законот беше објавен со потипис од Талат Џафери. – одговори Костовски.

Претходно ВМРО-ДПМНЕ му упати предупредување дека може кривично да одговара доколку ги објави актите, а од „Службен весник“ се огласија дека одговорноста за тоа е кај собранискиот спикер Талат Џафери, но и кај Иванов, кој според јавното претпријатие, оритивуставно одбивал да ги потпише указите иако бил должен тоа да го направи.

Синоќа Џафери објави дека го испратил законот со кој албанскиот јазик станува втор официјален во Македонија за објавување во „Службен весник“ по што за кратјо време неколку владини функционери од ДУИ честитаа со свои пораки.