Села не сака да биде последен на списокот за пратенички прашања
Објавено во: Македонија 27 Февруари, 2019
Зијадин Села, лидерот на Алијансата за Албанците, се закани дека ќе ги опструира следните пратенички прашања доколку не и се дозволи на албанската опозиција во Собранието да биде меѓу првите на списокот што ќе ги поставуваат до владините функционери.
Тој се побуни дека е на 17 позиција на списокот за поставување на пратенички прашања и рече дека следниот пат ако треба ќе нема седница, доколку опозицијата не биде погоре на листата, додавајќи дека сето ова е направено намерно со цел да се сокријат последните случувања во Парламентот.
„Дали со тоа што сум на 17 позиција на списокот за поставување на пратенички прашања, а претходно албанската опозиција беше погоре, се сака да се сокрие она што се случуваше во изминатите неколку денови во Собранието? Доколку не бидеме погоре, следниот пат ќе правиме врева, па по цена и да нема седница. Ако погоре на листата имаше некој друг од албанската опозиција, ќе немав забелешка. Ова е непочитување од страна на Парламентот“, изјави Села на собраниската седница за пратенички прашања.
Села смета дека со тоа што е 17-ти на листата нема да има време да му биде овозможено да постави прашање на Седницата.