Семејство со три генерации од Канада загина во авионската несреќа во Етиопија
Објавено во: Свет 12 Март, 2019
Во боингот во Етиопија загинале три генерации од канадско семејство.
Меѓу 18-те Канаѓани, било и шестчленото семејство Диксит-Ваидја, пишува „Гардијан“. Три генерации од ова семејство патувале на одмор во Кенија.
Триесет и седумгодишната Коша Ваидја е родена во Кенија и решила да го посети својот роден град по многу години.
Таа патувала со нејзиниот сопруг, 45-годишниот Прерит Диксит, малолетните ќерки Ашка и Анушка и родителите, 71-годишниот Панагеш и 63-годишната Хансини.
Мананат Ваидја, член на семејството кој не бил на летот, изјавил дека семејниот одмор во Кенија требало да биде прва посета на неговата сестра на родното место по неколку децении. Мртвите девојчиња имале 14, односно 13 години.
Коша работела во Канадската асоцијација за глуви, како советник за човечки ресурси.
„Многу ќе ни недостасува. Ќе ја паметиме по нејзината интелигенција, професионалност и динамична личност“, изјавила Јулија Думанијан, претседател на здружението.
Семејство живеело во Брамптон во близина на Торонто.
Во Етиопија во неделата се урна авион „боинг 737“ на компанијата „Етиопијан ерлајнс“ на лет кон главниот град на Кенија, Најроби.
Во несреќата загинаа сите 157 патници и членови на екипажот.
Меѓу нив биле 32 луѓе од Кенија, 18 од Канада, девет од Етиопија, девет од Велика Британија, по осум од Италија, Кина и САД и седум од Франција.
Причината за падот не е позната.