Што се содржи нацрт спогодбата што Коѕијас во четврток ќе ја донесе во Скопје?

Добивај вести на Viber

Грчката нацрт- спогодба, содржи околу 55 параграфи сместени на 20 страници со сите отворени прашања меѓу Македонија и Грција соопшти грчкото радио „Атина984“.

Според  дописникот на МИА од Атина, новинарката на радиото наведува дека нацрт предлогот е подготвен од грчкото МНР, опширно разгледан меѓу премиерот Алексис Ципрас и Никос Коѕијас, а ги содржи точките што ги најави и самиот шеф на грчката дипломатија.

Во однос на имињата што се вклучени, радиото во текстот коментира дека Горна Македонија, е „фаворит“ за Атина, но без превод, „нешто што многу тешко ќе биде прифатено од другата страна“.

Грција побара и промена на Уставот.

„Прашањето за промена на името како и други теми што се однесуваат на Уставот на соседната земја за негова промена е едно од основните барања на Атина како „гаранција“ за имплементација на ерга омнес за употребата на новото име, односно да биде и за внатрешноста и за надвор. Уставната промена бара мнозинство во Собранието на ПЈРМ, нешто што го нема владината коалиција на СДСМ и албанската ДУИ“, објавува радиото „Атина 984“.

Новинарката додава дека постојат контрадикторни информации за тоа дали нацрт спогодбата е доставена до македонската страна или не. Во грчките медиуми, за време на викендот се појавија информации од американски извори дека Атина веќе го испратила предлогот.

„Според некои информации грчките предлози веќе се испратени од 12 март, додека, пак, според дипломатски извори од ПЈРМ, се уште не е испратена нацрт спогодбата, која што, како што велат, ја очекуваат со пристигнувањето на грчкиот министер за надворешни работи во четврток“, објавува Атина 984.

Во однос на информациите во грчките медиуми од изминатите денови, дека нацрт спогодбата е доставена до Македонија, македонски дипломатски извори за МИА велат дека грчките предлози не се пристигнати и очекуваат нив да ги достави самиот Коѕијас при неговата посета на Скопје.

Патувањето на шефот на грчката дипломатија во Македонија, со лет директно од Атина за Скопје, веројатно ќе биде на 22 март, а радиото „Атина 984“ коментира дека тогаш одново ќе започнат критичните разговори за решавање на разликите околу името.