Швајцарците остануваат најбогатите луѓе во светот
Објавено во: Економија, Свет 23 Ноември, 2016
Богатството на возрасен Швајцарец изнесува 562 900 долари.
Швајцарците се најбогатите луѓе во светот, а просечното богатство на возрасен Швајцарец изнесува 562 900 долари, се наведува во годишниот извештај за светското богатство на швајцарската банка Кредит Свис.
Швајцарија ја предводи листата на најбогатите луѓе 16-та година по ред.
Американците се зад Швајцарците со средства во вредност од 344 700 долари на човек. По нив следуваат Британците со богатство од 288 800 долари.
Турбуленциите на британската фунта по одлуката на Велика Британија да излезе од ЕУ избришаа 1,5 трилиони долари од средствата во земјата, прецизира Кредит Свис.
За прв пат од светската финансиска криза во 2008 година, средното светско богатство на возрасен не е променето и изнесува 52 800 долари.
Извештајот наведува дека уделот на нефинансиските средства на луѓето како дел од богатството им се зголемил за прв пат од 2008 година.
Зголемувањето на цените на недвижностите доведе до зголемување на приватното богатство во неколку земји, вклучувајќи ја и Германија.
Групата на супербогатите луѓе кои поседуваат најмалку 50 милиони долари, е зголемена за 3% до 4100 лица во изминатата година главно благодарение на азиските земји.