„После ова издание на Евровизија, сметам дека донесов правилна одлука“: еве што вели Јаневска за познатата манифестација

Добивај вести на Viber

Минатата година, тимот на МТВ ме покани да ја претставувам Македонија на Евровизија 2024 во Малме. Им одговорив дека со задоволство ќе прифатев да беше 2000 година, кога се натпреварував со „Твоето писмо моја библија" или 2001 година кога на Скопскиот фестивал победив со „Носталгија". 

Ова го напиша на својот Фејсбук профил нашата истакната пејачка и професорка Андријана Јаневска, која меѓу другото потенцираше дека „Евровизија“ го губи своето занчење. 

- Тогаш имав 20 години, кариерата ми беше во подем и имав желба да направам нешто за Македонија. 

Исто така, тоа беа времиња кога Евровизија сè уште важеше за некаков културно-уметнички натпревар помеѓу народите и кога секоја земја се натпреваруваше со песна на својот јазик - напиша Јаневска на својот Фејсбук профил.

Таа дополни, дека денес има 42 години и се чувствува исполнето, среќно и остварено на приватен и професионален план. 

- Што се однесува до мојата желба да направам нешто за Македонија, тоа го направив преку докторскиот труд на кој работев девет години, со кој успеав да заштитам над 150 македонски народни песни во регионите Мала Преспа, Голо Брдо и Гора, кои соседните држави претходно суптилно, а во последен период јавно почнаа да ги претставуваат како свои - дополни Јаневска и истакна:

„Благодарност до МТВ за укажаната можност, но, после ова издание на Евровизија, сметам дека донесов правилна одлука“.

Еве ја нејзината објава:

Фото: Принтскрин/Фејсбук