Силјановска Давкова за МИА: Името е правен факт, ќе кохабитирам со власта
Објавено во: Македонија 06 Април, 2019
Нема да го избегнува потпишувањето на законите заради името Република Северна Македонија и најавува дека ќе кохабитира со власта и со неа ќе гради компромис. Кандидатот за претседател од ВМРО-ДПМНЕ Гордана Силјановска Давкова во интервју за МИА вели дека името е правен факт и дека ако дојде на функцијата нема веднаш да се стави во акција да го тргне. Ако стане претседател, како што вели, ако сака да стави вето на некој закон тоа ќе го образложува пред пратениците.
Силјановска не се сомнева дека грчката опозиција еден ден ќе го прифати Договорот од Преспа, за македонската не дала одговор во интервјуто.
Силјановска Давкова верува дека Македонија ќе влезе во НАТО по Преспанскиот договор, но смета дека тој е повеќе плод на геостратешка политика, отколку вистинско решавање на спорот меѓу двете земји. Влезот во ЕУ, според Силјановска-Давкова, е малку потежок поради реформите што се потребни на тој пат, а смета дека реформи досега не се направени, освен што изминатиот период било решено името.