Силна економија и покрај тензиите со Вашингтон
Објавено во: Економија 18 Април, 2018
Економскиот раст на Кина е силен и во првиот квартал од 2018 година, поради инвестициите и забрзаната експанзија на електронската трговија.
Тој ги надминал очекувањата и прогнозите. Владата се бори да го одржи балансот со долговите, без да го наруши растот.
Кина забележа раст и покрај зголемувањето на трговските тензии со Вашингтон.
Втората најголема економија во светот порасна за 6,8 проценти во првите три месеци на годишно ниво, што е на ниво од претходниот квартал и незначително повеќе од вкупниот раст остварен во цела мината година од 6,9 проценти, покажаа денешните податоци на кинескиот Државен завод за статистика.
Зголемувањето на бруто домашниот производ (БДП) ја надмина официјалната цел на Владата за 2018 година од околу 6,5 проценти, пренесува агенцијата АП.
Економските аналитичари, очекуваат ладење на растот во 2018 година затоа што Пекинг настојува да го ублажи растот на долгот со заострување на контролата во секторите за продажба на недвижнини и банкарското кредитирање во кое веќе долго се бележи вистински бум.
Прометот во малопродажбата е зголемен за 9,8 проценти во однос на декемвриското ниво од 9,4 проценти, додека прометот во електронската трговија скокнал за 35,4 проценти, што е за 3,3 проценти повеќе отколку во претходниот квартал.
Инвестициите во фабриките, во недвижнините и во останатиот имот скокнале за 7,5 проценти во однос на растот од 7,2 проценти во 2017 година.
Фабричкото производство во извештајниот квартал е зголемено за 6,8 проценти во однос на една година претходно.