Софтверска компанија „Seavus“ го купи едукативниот сектор на „Александрија“

Добивај вести на Viber

Најголемата македонска ИТ и софтверска компанија во Македонија „Seavus“ го купи најстариот домашен специјализиран центар за едукација и дообразба во ИТ секторот „Александрија“.

Со ова групацијата  „Seavus“, во чиј состав е и Seavus едукативниот и развоен центар (SEDC), ја зазеде лидерската позиција на македонскиот пазар за ИТ едукација, а се најавува и пробив на странски пазари. Согласно договорот што двете компании го потпишале во четвртокот во Скопје, „SEDC“ во целост го презема портфолиото, кадрите и програмите на „Александрија“. „SEDC“ е присутен на пазарот повеќе од три години и веќе се разви во препознатлив креатор на најсовремени програми и иновативна методологија за едукација на кадри барани од ИТ индустријата, додека „Александрија“ веќе 20 години развива генерации инженери преку специјализирани курсеви и обуки од областа на информатиката и мрежните технологии. На аквизицијата и’ претходела успешна соработка меѓу двете компании, а токму еден голем проект кој бил успешно реализиран минатата година, ги поттикнало компаниите да размислуваат да ги спојат силите, ресурсите и знаењето. „Александрија“ е препознатлива во креирањето кадри за мрежен администратор, мрежен техничар и мрежен дизајнер, додека „Seavus“ повеќе беше насочен кон креирање на програмери и дизајнери. Двете компании на оваа голема промена гледаат како на здрав чекор кон натамошниот напредок на македонскиот ИТ пазар кој ќе помогне во креирање и одржување на стандарди и кадри на светско ниво. Станува збор за еден од неколкуте случаи досега на преземање на македонска компанија од страна на друга домашна компанија. Планот за реализацијата на преземањето опфаќа и амбициозна стратегија за долгорочен раст и развој, при што се најавува проширување на досегашниот пакет курсеви и специјализирани академии, нови методологии на изучување, досега неприменувани на македонскиот пазар. Компаниите најавуваат дека за почеток ќе се концентрираат на домашниот пазар, при што истакнуваат дека 50 проценти од капацитетите за наредната студиска година веќе им се пополнети. Во иднина компаниите планираат да настапат и надвор од државата, за што ќе им послужат неколкуте канцеларии и претставништва на „Seavus“ ширум светот.