Сотирова-Бухова по истрагата за хорор-снимките од битолската болница: Тој период имаше многу починати, затоа лежеа заедно со живите
Објавено во: Македонија 27 Ноември, 2020
Ирина Сотирова-Бухова, директорката на Државниот санитарен и здравствен инспекторат, денеска пред медиумите рече дека е издадено решение по кое директорката на битолската болница мора да постапи веднаш и да го санира санитарниот чвор.
Ваквиот епилог следува откако се појави фотографија во јавноста како во тоалет во близина на инфективното одделение во битолската болница е поставен чадор за да не протекуваат фекалии над пациентите.
- Во Битола епилогот е за 24 часа издавање решение по кое директорката мора да постапи веднаш. ДСЗИ уште минатата година го забрани за употреба тој санитарен чвор и со решение нареди реконструкција. Во меѓувреме заради напливот на пациенти, овој дел од болницата повторно е отворен за употреба, освен санитарниот чвор. Директорката сега постапува за санирање на истиот за обезбедување на санитарно-хигиенските услови, рече Бухова.
Истиот ден се појави и видео како во една иста просторија во битолската болница лежат заедно двајца починати пациенти и двајца кои примаат инфузија.
- Во однос на другиот дел од инспекциски надзор со видео исечоци за починати и примање инфузија во иста просторија, тоа е тријажен центар за суспектни со Ковид-19. Случката е во 16.30 часот на 22 ноември, имајќи го предвид билтенот. Во Битолската болница имаше 13 егзитирани пациенти, а капацитет од четворица. Поради динамиката за подигање на телата, имаше недостиг од простор. Наложено е директорката да ја прошири моргата. Поставени се паравани сега и почитувањето на правото на приватност на пациентите се почитува, реферираше Сотирова-Бухова.