Спасовски: Од следната недела засилени контроли на викендици

Добивај вести на Viber

Министерот за внатрешни работи Оливер Спасовски најави дека од следната недела полицијата ќе започне со засилени контроли на викендиците, кои се забранети за издавање заради групирање и не смеат да се огласуваат за таа намена во наредниот период.

- Тоа се непопуларни мерки кои се неизбежни, а пред се да си помогнеме самите на себе. Имаме оперативна акција во издавањето на викендиците, веќе работат колегите и постапуваме превентивно до издавачите за да знаат со што се соочуваат. Акционите планови се изготвени. Започнуваат засилени контроли од наредната недела и ќе ги има во текот на новогодишната ноќ, рече Спасовски, а како примери ги спомена Сопиште, Маврово, Струга.

Тој рече дека во првите 100 дена од новата Влада поднесени се над 250 кривични пријави за групирање. 

- Загрозувањето на јавното здравје е кривично дело. Секојдневно имаме разбивање на вакви групи, затворање на ресторани, растурање на семејни веселби и свадби. Се тоа  се процесуира до Јавното обвинителство, наведе министерот.

Спасовски наведе дека во изминатиот период за 50 отсто се намалени глобите за неносење заштитна маска.