Спасовски за ограничувањето на број на гости: И денеска има механизми за контроли и проверки на домовите
Објавено во: Македонија 09 Октомври, 2020
Оливер Спасовски, министерот за внатрешни работи, на денешниот брифинг со новинарите, рече дека домот е уставна категорија и дека ќе треба детално да се анализираат механизмите за тоа како би се спровеле контролите и проверките при евентуално непочитување на најавената предлог-мерка од Комисијата за заразни болести која предизвика негативни реакции во јавноста.
Првиот човек на МВР ова го најавува по вчерашната прес-конференција на министерот за здравство на која Венко Филипче промовираше три предлог-мерки од Комисијата кои што треба да бидат прифатени на владина седница, меѓу кои и забрана на семејни прослави и ограничување на најмногу четири гости.
- Граѓаните да знаат дека постапувањето на полицијата ќе биде исклучиво по уставните начела и според законските норми. Неповредливоста на домот или на станот е уставна категорија и тоа е свето нешто за секој граѓанин што никој не може да го загрози. За одлуките што ќе бидат донесени а се во функција на заштита на јавното здравје ќе бидат предвидени соодветни механизми на контрола, рече Спасовски.
Тој додаде дека ќе навлезе во детали кога ќе бидат донесени одлуките, но нагласи дека уставното начело на неповредливост на домот ќе биде почитувано. Додаде дека и денеска има механизми на проверки и контроли на домовите.