СТАТИСТИКА УТРЕ ЌЕ КАЖЕ - што се случило со македонскиот БДП во првите три месеци
Објавено во: Економија 07 Јуни, 2020
Утре ќе дознаеме како се движел македонскиот бруто домашен производ во првиот квартал од годинава.
Државниот завод за статистика треба да ги објави податоците за растот на домашната економија од јануари заклучно со март.
Корона кризата во првиот квартал немаше толку опасно влијание врз домашната економија колку што се очекува тоа да се случи во второто тримесечје.
Поточно, во првите два месеци таа воопшто и не постоеше, но проблемите почнаа во март, кога беше прогласена пандемијата, и веќе од средината на месецот целосно претснаа со работа одредени сектори, како што се туризмот, угостителството, транспортот...
Кога првично го проектираше буџетот за оваа година, Владата излезе со реално очекување за раст од 3,8 отсто, без никој и да претпоставуваше што ќе се случува со светската, а со тоа и со македонската економија.
Кога стана јасно дека корона кризата и тоа како ќе се рефлектира врз економските текови, со ребалансот на Буџетот Владата предвиде дека домашниот БДП годинава ќе оди во спротивна насока, односно ќе заврши со негатива од 3,4 проценти.
Притоа, најголем пад се очекува за вториот квартал, во третиот би имало благо закрепнување, а раст дури од четвртото тримесечје.
Инаку, индустриското производство во првите три месеци кумулативно паднало за 3,7 отсто.
Но, веќе во април има страшен пад на индустриското производство, од дури 33,5 отсто, но тоа ќе се мери во податокот за БДП за второто тримесечје од годинава.
Н.Н.Ф.