СТАТИСТИКАТА ПОТВРДУВА: Домаќинствата горат се повеќе дрва

Добивај вести на Viber

Поради затоплувањето на домовите со термо- печки, струјата е најчестиот вид енергија што го трошат македонските домаќинства. Електричната енергија учествува со дури 50,3 отсто во финалната потрошувачка на енергенти во домаќинствата. Но, тоа што е забележливо во статистичкиот извештај за 2017 година е зголемената употреба на биомасата, односно на дрва за греење, од година во година наместо овој процент да опаѓа. Нивното учество во финалната потрошувачка на енергенти во домаќинствата лани достигна 40,5 отсто, додека претходната година овој процент изнесуваше 37,5 отсто, што е уште еден доказ дека домаќинствата се повеќе се греат на дрва отколку на нови современи и еколошки начини за затоплување на домовите  Во многу помал обем се користат топлинската енергија (6,6 отсто) и нафтата (2,3 отсто), а најмалку се користат цврстите горива (0,3 отсто).

Едно македонско домаќинство со четири члена во просек месечно троши 498 киловат- часови електрична енергија, а според актуелната цена на струјата од 5,54 денари за киловат- час за скапа тарифа и 2,78 денари за евтина тарифа за да ја плати потрошената струја му требаат околу 2.100 денари. Ова, секако, не е износот на просечната сметка за електрична енергија, која секој месец ја добиваме во поштенските сандачиња, бидејќи во неа не се додадени комуналната такса за јавно осветлување и данокот на додадена вредност.

Според податоците од Државниот завод за статистика, секој жител годишно троши по 1.494 киловат- часови електрична енергија, односно финалната потрошувачката на електрична енергија во просечно македонско домаќинство со четири члена изнесува 5.976 киловат- часови. Пресметката покажува дека годишно се потребни околу 420 евра за да се плати сметката за овие потрошени киловати, односно просечната месечна сметка изнесува околу 35 евра. Секако овој износ не е рамномерно распределен во сите месеци, а кај оние семејства што се греат на струја сметката е најдебела во текот на зимските месеци.

Лани вкупното бруто- примарно производство на енергија во Република Македонија изнесува 1.161.152 тони нафтен еквивалент или 42,3 отсто од вкупно потребната енергија, а увезени се 1 669.517  тони нафтен еквивалент енергија.

Најголеми финални потрошувачи на енергија лани се сообраќајот со 37,1 отсто (нафтени деривати), домаќинствата со 26,9 отсто и индустријата со 19,5 отсто од расположливата финална потрошувачка.

(М.Б.)