Сведок во судница раскажа како Груевски купил два стана

Добивај вести на Viber

Секретарката во фирмата на Александар Ивановски -Теранова, Татјана Стојановска, денеска во судница изјави дека според имотните листови таму има два стана – еден на нејзино име, а еден на фирмата – но во суштина, тие не се нивни сопственици. Кажа дека тие станови се на екс премиерот Никола Груевски кој сега престојува во Унгарија, каде доби политички азил.

Oва беше кажано на денешното рочиште за случајот „Плацеви на Водно“. Стојановска ја објасни  правната постапка при купувањето на двата стана, во кои таа никогаш не влегла. Рече дека дека станот на нејзино име е од 2008-2009 година. Тогаш работела во фирмата „ИТК Инженеринг“, основана во тоа време за да учествува на некој тендер. Двата стана биле еден до друг.  Таа објасни дека ниту дала ниту видела пари за станот, само со човек од кај Груевски отишле на нотар, потпишале и целата работа брзо се завршила.

На денешното рочиште сведок беше и сопственикот на „ИГМ Трејд“ од Кавадарци, Илија Гечев. Тој рече дека тогашниот министер за транспорт, Миле Јанакиески, му понудил земјиште, плац на Водно од 1.200 метри квадратни, кој бил над куќата на Вилма Трајковска. Според неговите зборови, тоа земјиште чинело 1,2 милиони евра. 

Според обвинението, Груевски, од 2006 до 2012 година, како лидер на ВМРО-ДПМНЕ, дел од партиските донации ги задржувал за себе, па така прибрал најмалку 1,3 милиони евра. Многу често по сведочењата, Груевски на Фејсбук го кажува својот став за предметите, и во неколку наврати тврдеше дека се врши прогон против него.