Свилановиќ: Прогресот на соработката на Балканот е видлив и покрај осцилациите
Објавено во: Балкан 29 Јуни, 2017
Прогресот во регионалната соработка на Балканот и во Југоисточна Европа е видлив и покрај пречките и осцилациите што се создаваа повремено на националните и политичките сцени, оцени денеска Генералниот секретар на Регионалниот совет за соработка (РСС) Горан Свилановиќ.
Оценката доаѓа само ден пред состанокот на шефовите на дипломатиите и самитот на шефовите на држави или влади на Процесот за соработка во ЈиЕ (SEECP).
„Видлив напредок е постигнат во натамошното унапредување на трговијата и на инвестициските интеграции, на дефинирање на ефикасните политики за вработување, на засилување на соработката на полето на образованието, истражувањата и иновациите, на доброто владеење и на полето на соработка во областа на безбедноста“, рече Свилановиќ, зборувајќи на годишна средба на РСС во Дубровник.
„Иако регионалните предизвици и осцилациите на националните политички сцени понекогаш го попречуваа Регионалниот совет за соработка, можеме да се надеваме на напредокот кој е видлив во поглед на продлабочување на економската соработка, на силно управување и на стабилност во самиот регион“, додаде Свилановиќ.
Денеска беше поднесен неговиот годишен извештај за работата на РСС, меѓувладино оперативно тело на SEECP, кој беше одобрен од поканетите учесници на годишниот собир. Се очекува негово одобрување и усвојување и земјите членки на Процесот за соработка во ЈиЕ, кои утре и задутре на највисоко ниво ќе се состанат исто така во Дубровник.
Република Македонија е основач и полноправен член на SEECP и активно партиципира во активностите во регионот, што ги координира РСС.