ТЕОДОРАКИС: Ќе треба да разбере Заев дека патот до НАТО и Европа поминува низ Атина

Добивај вести на Viber

Претседателот на партијата Река, Ставрос Теодоракис во интервју за грчкото радио „Real fm“ вели дека Заев треба да сфати дека патот до НАТО и Европа поминува низ Атина. 

Во однос на последните изјави на македонскиот премиер, Зоран Заев тој  отфрла секаква можност да постои договор за двојна формула за името, јави дописникот на МИА од Атина.

Според него, не постои прашањето за двојно име. 

„Ќе треба да разбере Заев, кој на почетокот покажа сериозност, ќе треба да сфати дека патот за НАТО и за Европа не е право нагоре, туку поминува од Атина. Ова треба да го разбере“ – вели Теодоракис. 

Рече дека тој е од оние што поддржуваат компромис, но порачува дека и македонската страна треба „да ги направат неопходните отстапки“.

Смета дека иредентизмот ќе треба да се тргне од Уставот и учебниците. 

„Ако се мисли на тоа дека нема да стигнеме да го смениме Уставот, но ќе се обврземе во ОН, ќе се обврземе во НАТО, ќе се обврземе во Европската Унија дека ќе го сториме тоа, јасно дека ќе го прифатиме тоа“ – потенцира Теодоракис.

Додава договорот нема да биде со Грција, туку со ОН, со ЕУ и НАТО и „цената на каква било отстапка за Скопје ќе биде огромна“.

Заев деновиве изјави дека промени на Уставот нема да има и дека тоа би било недостоинствено, а потоа од грчката Влада рекоа дека можно е решение да нема на спорот, и тие исто така инсистираат на промени во Уставот.