Турците го открија селото од кое влече корени Борис Џонсон
Објавено во: Свет 26 Јули, 2019
Локалните жители на селото Калфат го повикале новиот британски премиер, Борис Џонсон да ги посети уште додека бил градоначалник на Лондон.
Победата на Џонсон во трката за премиер на Велика Британија ги израдувала мештаните на малото село Калфат во Турција, откаде премиерот влече корени, пренесува турски „Хуриет".
„Од нашето село потекнува човек кој може да има влијание на целиот свет. Почестени сме со тоа и горди сме на Борис", рекол Мустафа Бал, жител на селото Калфат во округот Орта во покраината Чанкири.
Вели дека меѓу жителите на Калфат, семејството на Џонсон се нарекува "Сариоџлангилер", што во буквален превод значи синови на русокоси.
Друг жител, Селин Баришкан, му честитал на Џонсон и рекол дека жителите очекуваат помош од него во решавање на проблемите на селото.Прадедото на Џонсон, Али Кемал, бил отомански новинар и политичар. Три месеци бил министер за внатрешни работи во владата на Дамат Ферит Паша, а бил и министер за образование.
Таткото на Кемал, Хаџи Ахмет Риза Ефенди, е роден во Калфат во 1813-та година.
Како противник на турската војна за независност од 1919-1923, Кемал живеел во егзил во Европа.