УСЛОВ ЗА ПРИЕМ НА КОСОВО ВО СОВЕТОТ НА ЕВРОПА: Го враќаат имотот на манастирот Дечани

Добивај вести на Viber

И aлбанскиот премиер Еди Рама ја поздрави одлуката на косовската влада за враќање на имотот на манастирот Дечани. 

Тој ја поздрави денешната одлука на косовската влада за спроведување на одлуката на Уставниот суд на Косово за манастирот Дечани.

„Целосно ја поддржувам одлуката ‘подобро некогаш отколку никогаш’ на Владата на Република Косово за спроведување на одлуката на Уставниот суд за Дечанскиот манастир. Го охрабрувам косовското раководство да продолжи да работи со нашите заеднички клучни сојузници и да покаже дека Република Косово е навистина кредибилен возрасен партнер на евроатлантската заедница“, објави Рама на социјалната мрежа Икс.

Одлуката на косовската влада денеска ја поздрави и високиот американски дипломат Габриел Ескобар.  Тој вели дека тоа беше тешка, но неопходна одлука. 

Владата на Косово денеска ѝ наложи на Агенцијата за катастар да ја спроведе одлуката на Уставниот суд за признавање на правото на сопственост на 24 хектари земјиште на Дечанскиот Манастир.

Премиерот на Косово, Албин Курти на почетокот на денешната седница на Владата рече дека оваа одлука ја донел, затоа што претставува услов за прием на Косово во Советот на Европа.

Тој рече дека Владата на Косово е исправена пред две опции: да го исполни овој услов и Косово да биде примено во Советот на Европа или да остане без членство. Според него, одлуката е донесена „водејќи се од здравиот разум“.

Курти нагласи дека и натаму ја смета одлуката за штетна, но додаде дека приемот во Советот на Европа ќе биде историска победа.

foto Wikipedia/Pudelek(Marcin Szala)