Вакцина против корона: Кога ќе ја имаме?

Добивај вести на Viber

Секој ден пристигнуваат нови податоци за научни лаборатории кои забрзано работат на создавање вакцина против корона вирус, додека Кина и САД почнаа со први тестирања на доброволци, а решенија бараат и Германци, Руси, Израелци и Канаѓани. Статистиките за бројот на заболени дополнително ги забрзуваат - до денес се потврдени повеќе од 416.700 заразени во светот, а умреле над 18.500 луѓе.

Светот се вклучува во таканаречено „солидарно испитување“ за потенцијална терапија против коронавирус – кое го покрена СЗО, а досега 10 земји го потврдија учеството во тестирањето на четири веќе познати лека. Меѓу нив е и „remdesivir“, експериментален лек развиен во текот на епидемијата на ебола во кој светската јавност денес полага најмногу надеж.

Првото излекување со ремдесивир го објавија Италијанците, откако пациент (79) години, заразен со вирусот COVID-19, бил третиран со овој лек и потоа на двапати покажал негативен резултатна корона.

Истовремено, кинеските официјални лица тврдат дека јапонскиот лек “favipiravir” познат и како Авиган, се покажал како ефикасен во сузбивањето на короната. Овој лек против грип го има произведено Тојама Хемикал, подружница на компанијата Фуџифилм која, освен по фотоапарати, сега е позната и во фармакологијата.

Здравствени и фармаколошки експерти, меѓутоа, моментално се скептични околу прашањето на однесувањето на секој од овие наведени медикаменти доколку се најдат во поширока употреба.

„Мораме да бидеме сигурни дека вакцината е апсолутно безбедна. Ќе ни треба барем една година. Ќе најдеме вакцина, но мораме да излеземе и да го направиме она што е неопходно“, рече извршниот директор на Светската здравствена организација (СЗО) Мајк Рајан.

Како потенцијални, постоечките решенија последниве денови се спомнуваа и како лекови против маларија.

Кога ќе се појави лекот во поширока употреба?

Сите споменати лекови всушност се развиени за лечење на други болести, а моментално дури 39 проекти се пријавени дека работат на пронаоѓање вакцина против коронавирусот. Иако конкретно решение сѐ уште нема, во Кина и САД веќе почнаа клинички испитувања на доброволци, додека Русите тестираат прототипи на потенцијални вакцини на животните. До вакцина за широка употреба, меѓутоа, ќе бидат потребни најмалку 12 до 18 месеци.

Тоа го потврди Зигфрид Том од Сојузот на истражувачки фармацевтски компании во Германија, кој вели дека моментално многу фирми и научни организации низ целиот свет сакаат да развијат вакцина против корона.

„Тоа е добро, бидејќи колку повеќе фирми се ангажираат, толку се поголеми и шансите вакцината брзо да се произведе“, вели тој.

Канадската компанија Medicago, во која сопственичко учество од 30 отсто има Филип Морис, што е атипично за тутунска компанија, веќе повеќе од деценија интензивно инвестира во наука и технолошки развој, меѓу првите понуди решенија за третман на коронавирусот.

Оваа биотехнолошка компанија брзо дојде до решение затоа што како биоректор го користи растението тутун наместо кокошкини јајца, кои најчесто се користат при традиционалните изведувања на лекот.

Проектот на Медикаго е исто така меѓу неколкуте кандидати на кои ќе им  бидат распределени 192 милиони долари за истражување во рамките на Стратешкиот иновациски фонд COVID-19 во Канада.

Германската фармацевтска компанија CureVac, зад која стои Дитмар Хоп, германски милијардер и сопственик на фудбалскиот клуб Хофенхајм, својата вакцина ја очекува наесен.

Вакцина за „целиот свет“

Експертите посочуваат дека во услови на пандемија и трка меѓу фармацевтските компании, развојот на вакцината нема да трае повеќе години, како што вообичаено е случај. И нагласуваат дека лекот не смее да биде достапен само на привилегираните поединци или држави.

Токму затоа шпекулациите за потенцијалниот откуп на вакцината од страна на Трамп наидоа на голема осуда на глобалната јавност, а првиот човек на CureVac, на кого наводно му се понудени пари, изјави дека, доколку им појде од рака да ја развијат, вакцината ќе биде достапна на целиот свет.  

Извор : http://rs.n1info.com/Zdravlje/a581735/Vakcina-protiv-korone-Kada-cemo-je-imati.html