ВАКЦИНИРАЊЕТО НЕМА ДА ЗАВРШУВА СО ВТОРАТА ДОЗА - Фајзер навестува дека ќе биде потребна и трета по 12 месеци

Добивај вести на Viber

Извршниот директор на компанијата Фајзер, Алберт Бурла, вели дека на луѓето кои примиле вакцина против коронавирус, најверојатно ќе им треба дополнителна доза во рок од 12 месеци по приемот на втората.

Тој исто така нагласил дека е можно луѓето да мора да се вакцинираат со една доза против коронавирус на годишно ниво.

„Исклучително е важно да се намали бројот на луѓе кои можат да бидат подложни на вирусот“, изјавил Бурла за CNBC.

Фајзер и партнерската компанија Бионтек на почетокот на овој месец изјавија дека нивната вакцина е ефикасна против разни видови на вирусот и дека заштитата трае најмалку шест месеци по втората доза.

Резултатите од третата фаза на клинички испитувања на вакцината Фајзер/Бионтек против коронавирус покажаа дека вакцината е 91,3 проценти ефикасна.

Новата стапка на ефикасност од 91,3 проценти е пониска од 95 проценти, кои првично објавени во ноември со 44.000 учесници во истражувањето.

Извршниот директор на Џонсон и Џонсон, Алекс Горски, исто така, за CNBC во февруари изјави дека на луѓето можеби им е потребна вакцината против ковид 19 секоја година, исто како што е потребно во случај на грип.

Сепак, експертите сметаат дека се потребни повеќе податоци и истражувања за да се утврди дали заштитата трае и по тие шест месеци.