ВМРО-ДПМНЕ бара разрешница за Рашковски, Дончев и Димова

Добивај вести на Viber

Опозициската ВМРО-ДПМНЕ излезе со реакција по оставката на секретарот на премиерскиот кабинет Драги Рашковски со барање до крај да бидат истражени аферите во кој тој наводно е вовлечен, како и да биде испитана неговата имотна состојба.

Од таму велат дека и поранешните директори на Фондот за здравство и Агенцијата за европски образовни програми , Ден Дончев и Лидија Димова, си поднеле принудни оставки, но без санкција.

Како што велат од најголемата опозициска партија, изнудената оставка на Рашковски пропратена со арогантен напад на јавноста не е преземање на одговорност. Овие милионски скандали не се покриваат со оставка, потребана е одговорност и судска разврска, порачуваат од опозицијата.

„Драги Рашковски има и тоа колку многу причини да одговара, почнувајќи од скандалот Леонардо, преку САРХЕМС, па до најновиот скандал со набавката на софтверот на МВР, но и за непријавениот имот, џип и хациенда. Но ако мислат Рашковски и неговиот шеф Зоран Заев дека со оставката ќе ги покријат милионските скандали, се лажат. Зоран Заев очигледно сака своите соработници кои се до гуша заглавени во криминали и корупција да ги спасува само со оставки“, се вели во реакцијата на ВМРО-ДПМНЕ.