ВМРО-ДПМНЕ: Ја загрозија препораката за ЕУ со насилното гласање
Објавено во: Македонија 16 Март, 2018
Опозициската партија ВМРО-ДПМНЕ во најновата реакција потенцира дека владејачкото мнозинство со инсистирањето да се гласа за Законот за употреба на јазици без амандманска расправа и без почитување на пошироката политичка волја ја доведе во прашање чистата препорака на Европската комисија за започнување на преговори за членство во ЕУ.
Зоран Заев и Талат Џафери режираа разочарувачки ден во Собранието, доведувајќи ја во прашање препораката за отпочнување на преговори за ЕУ. Ова е реакција на амбасадорот на Република Франција, Кристијан Тимоние во врска со насилничкото и недемократско носење на штетниот закон за двојазичност, соопштува ВМРО-ДПМНЕ.
„СДСМ го погази деловникот за работа на Собранието. Владеачкото мнозинство ја спречи амандманската расправа и насилно го прогласи неуставниот закон за двојазичност за изгласан. СДСМ ја обезвредни улогата на Собранието и пратениците и на сила истурка закон без да го испочитува правото на пратениците со амандмани да интервенираат во истиот.
Законот ваков каков што насилно го истурка власта е неуставен, неприменлив и штетен. За ВМРО-ДПМНЕ ваквиот закон е неприфатлив.
Насилното гласање е одлика на недостатокот на демократски капацитет на оваа власт. СДСМ покажа дека не знае да менаџира со државата за доброто на граѓаните. СДСМ во изминатава година демонстрираше насилств, незнаење, расипништво и злоупотреба на законите и институциите. Законите и институциите беа злоупотребени за пресметка со политичките неистомисленици на власта. Правосудните органи ги заборавија Уставот и законите и се ставија во служба на СДСМ, неосновано ставајќи во притвор десетина патриоти“, соопшти ВМРО-ДПМНЕ.