ВМРО-ДПМНЕ: Власта свесно предизвика инциденти и ја злоупотреби македонската полиција
Објавено во: Македонија 18 Јуни, 2018
Од ВМРО-ДПМНЕ велат дека власта свесно предизвика нереди, инциденти и потоа уште еднаш ја злоупотреби македонската полиција.
Колатерална штета се недолжни граѓани, возрасни луѓе, новинари, жени, за жал и мали деца, изјави денеска на прес - конференција Димитар Димовски од ВМРО-ДПМНЕ по вчерашните нереди пред Собранието.
„Настаните вчера пред Собранието беа дел од свесно и смислено сценарио исклучиво на власта. Зад таквото дело не стои друг туку самата власт. ВМРО-ДПМНЕ сакаат свесно да ја вовлечат во ова сценарио, за потоа да ја оцрнат и прикажат за радикален елемент, за да може пред меѓународната и домашна јавност да ја деградираат во борбата против капитулантското дело за промена на уставното името на Република Македонија од страна на Зоран Заев“- рече Димовски.
Вели дека целта е „граѓаните да се дисциплинираат, исплашат и дистанцираат, а Заев да се прикаже за конструктивен фактор.
„Сакаат да го деградираат и правото на мирен протест кој секој еден од нас го има, вклучително и во иднина тоа да не се практикува. Сакаат граѓаните да ги доведат во една нова апатија, додека тие продолжуваат со понатамошното опустошувањето на државата. Всушност Зоран Заев посакува нов 27-ми април за да може подоцнa себе си да се прогласи прво за жртва, па потоа за наводен спасител“- изјави Димовски.
Од ВМРО-ДПМНЕ апелираат народот да не потпаѓа на провокации.