Во ВМРО-ДПМНЕ незадоволни од завршувањето на истрагата за „Рекет“

Добивај вести на Viber

Опозициската ВМРО-ДПМНЕ е незадоволна од завршувањето на истрагата за случајот „Рекет“ и како што велат од таму, без да биде проширена во редовите на високата политика. Сашо Дукоски, адвокатот на првообвинетиот Бојан Јовановски, вчера прв обзнани дека истрагата е завршена, а потоа официјално тоа го потврди и самото Јавно обвинителство за организиран криминал и корупција.

„Вилма Русковска вчера покажа дека е само пипка на октоподот на Зоран Заев. Затворањето на истрагата за случајот Рекет, и затворање на рекетарскиот ланец со Катица Јанева е прикривање трагите кои водат директно до врвот на власта, се вели во партиското соопштение на опозициската ВМРО-ДПМНЕ.

Инаку во случајот „Рекет“ засега осомничени се само Јовановски, специјалната обвинителка Јанева и Зоран Милевски. Јовановски и Милевски на распитот кај обвинителката Вилма Рускоска одлучија да молчат, а денеска повикана во обвинителството е и Јанева. На сите тројца им е одреден притвор.

- Со месеци, скоро цела година сите институции од областа на финансиското разузнавање, безбедносните служби и  ЈО воопшто не реагирале во врска со милионскиот рекет. И на бруцоши на правен факултет им е јасно дека милионски рекет, кој траел со месеци не може да се прави без знаење на врвот на власта. Затворањето на истрагата со Катица Јанева е доказ дека Русковска цело време само барала начин како да ги спаси нарачателите и вистинските рекетари. Русковска и ЈО со неповикувањето на распит на Зоран Заев се доведуваат во ситуација да бидат соучесници во криминалот, велат од ВМРО-ДПМНЕ.

Од ВМРО-ДПМНЕ додаваат дека „и Рускоска и сите кои ја ограничуваат истрагата и ги штитат функционерите од власта“ треба да знаат, според опозицијата, дека еден  ден со враќањето на правната држава во Македонија ќе сносат одговорност за сторениот криминал.