ВОНРЕДНА СОСТОЈБА ВО ЕГИПЕТ: Дали терористите сакаат да го поткопаат единството меѓу христијаните и муслиманите?

Добивај вести на Viber

Египет прогласи вонредна состојба. 

Претседателот Абдел Фатех ал Сиси најави вонредна состојба од три месеци по вчерашните напади на две христијански цркви во земјата, при што загинаа најмалку 45 луѓе. Тој ја најави мерката која треба да биде поддржана од парламентот по состанокот на советот за национална безбедност. Претседателот ги обвини другите земји дека сакаат да предизвикаат нестабилност во Египет, но избегна да каже за кои земји станува збор.

Според египетскиот Устав, претседателот треба за период до една недела да побара одобрување од Парламентот. Законодавното тело е под контрола на поддржувачите на Ал Сиси, кој раководи со земјата од 2013 година, кога го собори од власт исламистот Мохамед Морси. ­ 

„Ви се обраќам не како христијани и муслимани, туку како Египќани. Терористите се обидуваат да го поткопаат нашето единство и потребно е да бидеме внимателни, за да ја заштитиме татковината“ - рече ал Сиси. 

Планирано е во Египет да биде создаден и висок совет за борба против тероризмот и екстремизмот. 

Коптските цркви често се мета на напади од исламистите. 

Во декември лани во коптска црква во Каиро при експлозија загинаа 25 лица. 

Христијаните сочинуваат околу 10% од 92-милионското население на Египет.