ВУЧИЌ МУ ЗАСТАНА НА ПАТОТ НА ШЕШЕЉ: Собири нема да има
Објавено во: Балкан 04 Мај, 2018
Српскиот претседател, Александар Вучиќ изјави денеска дека во селото Хртковци во недела нема да има никакви собири. Претходно лидерот на Српската радикална партија, Воислав Шешељ најави дека ќе има собир во селото за одбележување на годишнината од неговиот говор во 1992 година.
По говорот на Шешељ почна присилното иселување на Хрвати од Војводина, поради што Хашкиот суд го осуди за воени злосторства.
„Државата забрани митинг во Хртковци. Србија не сака во минатото туку во иднината. Србија нема да дозволи вознемирување на населението во кое било место во нашата држава“- изјави Вучиќ.
Тој ги замоли сите политички партии кои за тој ден најавија митинг во Хртковци да ја разберат одлуката на државата, бидејќи според него, државата има право да забрани митинзи кога постои сомневање за загрозување на јавниот ред и мир.