За Алаѓозовски „Скопје 2014“ е вирус кој треба да се стави во карантин
Објавено во: Македонија 18 Септември, 2017
Mинистерот за култура, Роберт Алаѓозовски денеска на отчетот во рамки на 100 - те дена Влада изјави дека преку штетни менаџерски договори и договори за закуп претходните раководства му нанеле штета на буџетот од околу 2,4 милијарди денари, или околу 39.000.000 евра.
„Скопје 2014“ како што кажа Алаѓозовски, е вирус кој треба да се стави во карантин.
„Без оглед на кусокот време за запознавање со состојбите, опструкциите, летните одмори и неприсутноста на дел од вработените, нашите инспекции работеа напорно и во дел од институциите најдоа сериозни индиции за злоупотреби, кои ќе бидат предмет на понатамошни соодветни процедури. Штетата за Буџетот на РМ само преку штетни менаџерски договори и договори за закуп откриена досега е некаде околу 2.4 милијарди денари. Наследивме огромни долгови, само за изведбата на Македонската филхармонија, на празен Буџет, државата им должи на изведувачите над 900 милиони денари, или околу 15 милиони евра“ - вели Алаѓозовски.
Преку изводите од службените картички, граѓаните имаа можност да дознаат за незаконската употреба на народните пари и луксузирањето на претходната владејачка гарнитура, додава министерот.
При тоа и во многу установи се забележани договори за огромни хонорари во однос на остварените задачи.
„За оркестрирање на концерт во Македонската филхармонија биле исплатени 200.000 денари, сценариото за отворањето на Охридско лето чинело 150.000 денари, изведба на сцена за Струшките вечери на поезијата чинела дури 750.000 денари, а е реализирана преку авторски договор со физичко лице, договори без распишување на тендер на сума поголема од 30.000 денари во Македонската филхармонија. Да не ја заборавиме и фактурата за коктелот за отворањето на новата зграда на Филхармонијата од 646.200 денари без спецификација на артиклите, делењето на стотици гратиси за отворањето на партиската свита, и самиот чин на таканаречено „отворање“ на објектот без соодветен технички прием, што е тешка злоупотреба на процедурите која можела да доведе во ризик и нечиј живот“ - вели министерот Алаѓозовски.
Институциите ќе се ослободат од директни партиски влијанија, рече Алаѓозовски. Ќе се спречуваат опструкции и ќе се озвозможат услови за откривање незаконитости и злоупотреби, а ќе се подобрат, како што рече и очајните услови за работа.