За грчкиот министер за одбрана, зборот „Македонија“ во името останува неприфатлив
Објавено во: Балкан 19 Декември, 2017
Зборот „Македонија“ е неприфатлив во името на државата. Ова го изјави грчкиот министер за одбрана Панос Каменос во однос на позицијата на неговата партија „Независни Грци“, соопшти електронското издание на весникот „Катимерини“.
„Независни Грци“ е помал коалициски партнер во Грција. Коментарот на Каменос дојде по последните разговори меѓу Атина и Скопје за ова прашање.
Кога вчера министерот посетил воен камп во Солун, тој рекол дека останува на ставот етаблиран во 1992 година на средбата на партиските лидери под покровителство на тогашниот премиер Константин Караманлис дека терминот „Македонија“ во името на соседната држава е неприфатлива опција за Грција .
Со цел да се промени оваа позиција, ќе биде потребен нов состанок со претседателот Прокопис Павлопулос. "„Катимерини“ потсетува дека сепак во 2007 година Атина се согласи зборот „Македонија“ да постои во името, но во сложено име кое ќе биде за севкупна употреба. Весникот коментира дека оваа позиција на Каменос значи дека премиерот Ципрас ќе треба да бара поддршка од други партии за да обезбеди одржување при решавањето на ова прашање.