Заев и Мицкоски во самоизолација до вторник

Добивај вести на Viber

Претседателите на СДСМ и ВМРО-ДпМНЕ - Зоран Заев и Христијан Мицкоски во самоизолација ќе бидат до вторник изутрина, до кога ќе трае и тродневниот карантин за време на празничниот викенд во Македонија.

Интервјуата со заразениот новинар на Канал 5 на двајцата партиски лидери се случија пред две недели, од кои тоа со Заев на 2 април, а ден потоа, на 3 април, се емитуваше и она со Мицкоски. Во меѓувреме и двајцата беа тестирани како негативни на вирусот Ковид-19, но превентивно според протоколот, мораше да останат дома во самоизолација до навршување на 14 дена од контактот.

До крајот на оваа недела им истекува периодот на самоизолација на Заев и Мицкоски, но во меѓувреме од утре во 16 часот стапува во сила тридневниот карантин кој ќе трае до вторник во 05.00 часот.

– Согласно решението на Државниот санитарен и здравствен инспекторат јас и моето семејство сме дома во изолација. Ке бидеме дома заклучно со завршување на Велигденските празници. Работам од дома колку е тоа можно. Но среќен сум што сум со семејството заедно во изолација по цели денови- вели Заев во денешната изјава за 24 Инфо, каде што најавува дека на секојдневните обврски ќе им се врати по велигденските празници.

Мицкоски од својот дом речиси секој ден испраѓа видео-обраќања, а во последното ја критикуваше власта дека не сака да прогласи кризна состојба во Куманово и за одбивањето на иницијативата на најголемата опозициска партија за времена пренамена на уплатите од вториот во првиот пензиски столб.