АБАЗ: Америка ги прекрши меѓународните закони, Eрусалим е црвена линија

Добивај вести на Viber

Америка ги прекрши меѓународните закони, ветото на нацрт-резолуцијата на СБ на ОН е „агресија“ врз Палестинците, вели палестинскиот претседател Махмуд Абас. 

Претходно Вашингтон стави вето на нацрт-резолуцијата на Советот за безбедност на ОН за полноправно членство на Палестинците во оваа интернационална организација.

Во интервју за палестинската агенција ВАФА, Абас нагласи дека „неодговорното“ и „срамно“ вето на Америка претставува „агресија“ врз правата, историјата, земјата и светилиштата на палестинскиот народ и дека овој потег го доведува во прашање почитувањето на волјата на меѓународната заедница.

„Додека светот се согласува да го применува меѓународното право и да стои на страната на Палестина, Америка продолжува да ја поддржува окупацијата, одбивајќи да го принуди Израел да ја прекине својата геноцидна војна. САД му обезбедуваат на Израел оружје и средства што ги убиваат нашите деца и ги уништуваат нашите домови, а тие стојат против нас на меѓународните форуми и не придонесуваат за безбедноста и стабилноста во регионот“, рече Абас.

Тој ја обвини администрацијата на претседателот Џозеф Бајден дека не ги почитува ветувањата и обврските, молчејќи за наводната израелска кражба на палестинските фондови.

„Ерусалим со неговите исламски и христијански свети места е црвена линија што никој не може да ја помине“, вели Абас. 

Министерството за здравство на Газа денеска соопшти дека од почетокот на војната меѓу Израел и палестинското исламистичко движење во Газа на 7 октомври лани, загинале 33.843 лица. Најмалку уште 46 лица загинаа во последните 24 часа, соопшти Министерството.