Британската економија ја очекуваат турбуленции во текот на Брегзит
Објавено во: Свет 03 Октомври, 2016
Британската економија ќе се соочи со стресови, додека владата преговара за излегувањето на земјата од Европската унија. Ова го изјавил денеска министерот за финансии на земјата Филип Хамонд, пренесоа светските агенции.
„Ќе треба да очекуваме шокови, додека минуваме низ преговарачкиот процес и ќе има период од неколку години, во кои бизнисот ќе биде неизвесен за конечната состојба на нашите односи со ЕУ и за време на овој период ќе треба да ја поддржуваме економијата“, изјавил Хамонд.
Тој додава дека сака да види договор за Брегзит, според кој британските компании ќе имаат максимален пристап до единствениот пазар на ЕУ, додека истовремено владата ќе го почитува повикот на граѓаните да ги контролира границите на земјата.
Филип Хамонд на конференција на конзервативната партија вели дека тој ќе управува со јавните финансии на земјата на поинаков начин од својот претходник Џорџ Озборн.
Тој ветил „нов план за ситуацијата пред која се наоѓала Велика Британија пред да се соочи со гласањето за Брегзит.
Во неделата премиерот Тереза мај рече дека Велика Британија ќе започне официјални преговори за „развод“ со ЕУ до крајот на март следната година.