ГАЗДИТЕ ПОВЕЌЕ ОТПУШТААТ ОТКАКО НЕМА ДРЖАВНА ПАРИЧНА ПОМОШ - отказите достигнаа до 30 илјади
Објавено во: Економија 02 Септември, 2020
Премиерот Зоран Заев денеска ги повика бизнисмените кои имаат фирми да не ги отпуштаат работниците.
Тој најавува дека за компаниите државата и натаму ќе дава парична помош, преку новиот сет на економски мерки.
Според премиерот Заев, бројот на граѓани кои останале без работа е неприродно зголемен, откако работодавачите останаа без владината помош од 14.500 за зачувување на работните места. Државата по овој основ исплати 90 милиони евра за три месеци односно од април до јуни.
„Бројките неприродно пораснаа од 12 до 13 илјади, до 22 и 23 илјади отпуштени, според некои статистики стигаат бројките и до 30 илјади, но не се 140 илјади или 100 илјади. Треба да знаат деловните луѓе, дека државата продолжува да помага, сакаме да им се најдеме, но не можат да очекуваат секогаш директна поддршка ако не водат грижа за својот највреден капитал, а тоа се работниците“, рече премиерот Заев денеска пред стопанствениците.