ГРОМОГЛАСЕН АПЛАУЗ ЗА СМЕНЕТИОТ ДИРЕКТОР - Д-р Јовев: За осум години израснавме во водечки регионален центар - за награда добиваме смена (Видео)
Објавено во: Македонија 06 Јуни, 2023
Очекував ваква поддршка. Ова е мојот тим, има и пациенти кои се дојдени да дадат поддршка. Не сакаме да се работи за политика, сакаме да се работи професионално, да бидат задоволни сите, ние се жртвуваме за оваа држава. Во 35 години работење, немам ниту еден ден боледување. Минатата година имав такви притисоци, поради кои морав да земам боледување.
Ова го кажа разрешениот директор на Клиниката за кардиохирургија, д-р Сашко Јовев денеска во присуство на вработени и негови колеги од Клиниката како и пациенти кои се насобраа пред клиниката.
- Имав притисоци дека сум направил грешка во самиот протокол за настанот при отворањето на нова хибридна сала, единствена во регионот. Се случи да тоа беа уредно поканети сите, но единствено министерот за здравство не дојде, сметајќи дека нешто подоцна е дадена поканата за него, а порано за премиерот. Јас не можев да се мешам, тоа е Влада и они решаваат меѓусебе, а јас се најдов на средина. На крајот јас испаднав жртва, но и Кардиохирургија. Даваме лоша лекција на сите млади после нас, рече Јовев на прес-конференција за неговото разрешување од страна на првиот човек во здравството, Фатмир Меџити.
Тој порача дека на Клиниката нема работно време, туку се работи секојдневно 24/7.
- Клиниката заедно со овој посветен, едуциран, мотивиран и мултиетнички тим, во последните осум години создаде ултра модерна клиника во која се работат сите светски зафати. Создадовме најопремена клиника, реализирани усовршувања во регионот. За осум години израснавме во водечки регионален центар. Сега за награда, дали од каприц, или од други причини, добиваме смена. Покажуваме одличен пример на младите, дека ако се учи, ако се сака и се работи 24 часа, и ако се опреме клиниката со најмодерната технологија, не чини, туку треба да ја напуштиме клиниката и државата - кажа професорот Јовев, кој пак ја повика Владата и министерот за здравство да ја преиспитаат одлуката и истакна дека тимот кој победува не треба да се менува.
Тој исто така посочи дека треба да се остават професионалците да ја вршат својата работа, и да се тргне политиката на страна.
На неговиот говор тој во неколку наврати добиваше аплазу од колегите и од пациентите кои исто така беа собрани пред Клиниката за кардиохирургија, каде изразија поддршка за докторот. Тие посочија дека благодарение на интервенциите од Јовев, сега се живи и здрави. На протестот излегоа и вработени од Клиниката. Дел од нив, сметаат дека ваквото постапување е бркање од дома на разрешениот директор.