Италија добива нова Влада, но без Салвини
Објавено во: Свет 29 Август, 2019
Италија ќе има нова влада.
Првите луѓе на италијанската Демократска партија на левиот центар (ПД) и популистичкото движење Пет ѕвезди вчера соопштија дека се договориле да формираат коалициска влада.
До договорот дошло кога Демократската партија се согласила на барањето на Пет ѕвезди Џузепе Конте повторно да биде премиер. Потоа тие побарале од претседателот на државата да му го даде на Конте мандатот за формирање нова коалициска влада.
„Му кажавме на претседателот дека постигнавме договор со ПД, кој ќе овозможи Конте да биде следниот премиер“, рече водачот на Пет ѕвезди, Луиџи ди Мајо, по средбата со италијанскиот претседател Серџо Матарела, која беше последната можност да се излезе од кризата, пренесува Би-би-си.
По состанокот со претседателот на Италија, претседателот на Демократската партија, Никола Цингарети, рече дека смета дека „вреди да го пробаме ова“.
Откако Конте ќе му предложи список на министри на претседателот Матарела, двата дома на италијанскиот парламент треба да гласаат за доверба на новата влада.
Планираната заедничка администрација ќе работи до следните закажани избори во 2023 година.
Актуелниот министер Матео Салвини, соопшти дека е изненаден од оваа одлука. Предупреди дека новата колација нема да владее вечно, бидејќи немаат што да понудат на Италија, а единственото нешто што ги држи заедно е омразта кон неговата партија Лига.