Костовски повеќе не е член на одборот на директори на Берза и на ЦДХВ

Добивај вести на Viber

Коста Костовски, син на бизнисменот Трифун Костовски и косопственик на сега пропаднатата Еуростандард банка, повеќе не е неизвршен член на Одборот на директори на Македонската берза за хартии од вредност, а не е веќе член ниту на Одборот на директори на централниот депозитар за хартии од вредност.

Како што известија од овие две интитуции, Костовки поднел оставки од двете функции.

-Согласно член 166-б од Законот за хартии од вредност, известуваме дека е поднесена оставка од страна на г-динот Коста Костовски од функцијата неизвршен член на Одборот на директори на Берзата и е направен упис на оваа промена во тековната состојба на Берзата, којашто се води во Централниот регистар на РСМ, соопштија денеска од Берзата. 

Исто известување дадоа и од ЦДХВ. 

Како што е познато, до скоро, односно до 16 јуни годинава Костовски беше претседател на Одборот на директори на берзата, по што беше направена промена и на негово место дојде Тони Стојановски од Стопанска банка. 

Рокадата беше изгласана на седница на Одборот на директори на берзата на 12 јуни, по што Коста Костовски продолжи да биде член на Одборот на директори, но не беше на негово чело.