На овој музеј Бијонсе со својот спот му донесе над 10 милиони посетители
Објавено во: Свет 07 Јануари, 2019
Најпознатиот музеј во светот, Лувр во Париз, лани имал повеќе од 10 милиони посетители.
Тој ја надмина бројката од десет милиони посетители во 2018 година, неспоредлива за еден меѓународен музеј на ликовна уметност и антиквитети, јави дописникот на МИА.
Ново е тоа што секоја сабота има бесплатен влез, но во период од 18 до 21.45 часот.
Се смета дека ваква бројка на туристи е постигната поради музичкиот спот на Бијонсе и Џеј Зи.
Тие лани ги изненадија своите фанови со уметничко видео, снимено во парискиот музеј.
Во видеото на Бијонсе и нејзиниот сопруг Џеј Зи - „Apeshit" можат да се видат слики како Мона Лиза, како и други светски познати уметнички дела. Видеото е видено преку 146 милиони пати на Фејсбук.
Од Лувр велат дека за успехот придонела и изложбата на францускиот уметник Делакроа.
Од музејот забележуваат значително зголемување на странските туристи, тоа е скоро три четвртини од сите посетители. Најчести посетители се туристите од САД, Кина, други европски држави и Бразил.
Музејот го посетиле 8,1 милиони луѓе во 2017 година, што претставува зголемување од 10 отсто во однос на 2016 година, кога имаше затишје поради нападите. До 2025 година се очекува овој музеј да има над 12 милиони посетители годишно. Во 2010 година имале 8.5 милиони туристи. Во 2013 година во Лувр влегле 9.7 милиони луѓе.
фото Википедија