На пат ли е Ангела Меркел да ја загуби Европа?
Слабоста во Германија ја попречува во Унијата.
Објавено во: Свет 20 Септември, 2016
Тешко е да се сети човек што уште можеше да направи германската канцеларка, Ангела Меркел во последниве недели, за да ги поттикне останатите европски лидери кон постигнување на консензус за периодот по Брегзит.
При подготовките за самитот на 27 од 28-те земји членки на ЕУ (без Британија) во Братислава, која се одржа во петокот, канцеларката се сретна лично со 24 од 26-те колеги.
Пред тоа таа ги посети Варшава, Талин, Прага, Париз и италијанскиот остров Вентотене. На крајот сите овие консултации и напори не доведоа до никаков резултат, пишува Ројтерс.
Меркел се откажа од фразата „Ќе се справиме".
Братислава беше целосен неуспех. Францускиот претседател, Франсоа Оланд и словачкиот домаќин, Роберт Фицо демонстрираа емпатија и оценија дека има прилично слаби резултати од самитот. Италијанскиот премиер, Матео Рензо и неговиот унгарски колега, Виктор Орбан сепак почнаа да го критикуваат документот, уште пред мастилото да се исуши.
„Не знам што има предвид Меркел, кога зборува за духот на Братислава. Ако работите продолжат така, наместо за духот на Братислава, ќе зборуваме за сеништето на Европа“ - рече Ренци.
Меркел го поставуваше курсот на Европа речиси една деценија.
Таа претрпе пораз во намерата да ги убеди партнерите на Берлин од Европската унија да прифатат миграциски квоти.