ОДГОВОРНИ НА БЛОКОВИ, СОБИРАЧИ НА СМЕТ, ВОЗАЧИ, ЧИСТАЧ... - еве кој тип на вработени од вкупно 27 добија откази од Комунална хигиена
Објавено во: Македонија 11 Јули, 2023
Нема милост за учесниците во протестите во Комунална хигиена. Синоќа во тензична атмосфера се поделени уште 27 откази. Тоа го дознале откако отишле на работа во трета смена, каде се прочитале на огласната табла.
Според информациите, 27-те лица кои добиле откази биле учесници во протестите, а 10 од нив биле на позиција „одговорни на блокови“, седуммина вработени кои собираат смет, пет возачи на специјални тешки товарни возила, еден одговорен на смена како магационер, чистач, возач на лесно специјално возило за товарење и возач на мало возило што чисти патишта.
Како што е познато, протестирачите три дена по ред протестираа со барање за повисоки плати, исплата на К-15 и други услови.
Според градоначалничката на Скопје, Данела Арсовска и директорката за претпријатието, Косана Мазнева, во ЈП Комунална хигиена имало големи злоупотреби. Биле вработени 70 лица од едно семејство, а 43 од друго. Обвинија дека постоеле мафијашки кланови, па само одредени лица работеле ноќна смена, а некои од нив и воопшто не оделе на работа, а земале плата живеејќи и работејќи во Германија. Над 30 лица со години живеат во Германија, но земале месечни плати од Комунална хигиена.