ОГЛАСИ: Работа има за општи работници, продавачи, келнери, но што е со административните службеници?
Објавено во: Економија 21 Август, 2020
Во Македонија периодов најмногу се бараат општи работници, продавачи, шивачи, хигиеничари и келнери.
Овие податоци се објавени на веб страницата на Агенцијата за вработување, при што може да се забележи дека овие професии се на врвот, но на дното се административните службеници и за нив сега има најмалку слободни работни места.
Повеќе од 500 слободни работни места има за општи работници, за продавачи над 460, додека за келнери има повеќе од 330 слободни работни места. Се барат и повеќе од 530 шивачи, но и 227 хигиеничари.
„Мислам дека тоа што келнерите се во три најбарани професии нема врска со туристичката сезона. Келнери се бараат во текот на целата година. Тие се потребни во ресторани и кафулиња, но не мислам на оние кадри кои се приучени, како студенти, млади, туку на луѓе кои се образувале за таа струка и добро си ја знаат работата“, вели Крсте Блажески од ХОТАМ.
Понатаму на листата се возачи на камиони, готвачи, шанкери, програмери, градежни работници, бравари, тесари, заварувачи.
За административни службеници има шеесетина слободни работни места.
Најмногу слободни работни места има во Скопје, Битола, Тетово, Виница и Кавадарци.
На ниво на држава, според податоците на Агенцијата за вработување има повеќе од 7.300 слободни работни места, но состојбата се менува од ден во ден, со тоа што се пополнуваат дел од работните места, а се објавуваат и нови огласи.
Поради Ковид -19 многу луѓе во земјава ги изгубија своите работни места.
Околу 12 илјади лица се евидентирани дека останале без работа од почетокот на март до крајот на јули поради пандемијата на коронавирусот. Само минатиот месец 2.500 луѓе останале без работа.
Сања Атанасовска