САД со вето го блокираше полноправното членство на Палестина во ОН

Добивај вести на Viber

САД единствени гласаа против палестинската кандидатура за полноправно членство во Обединетите нации и со тоа ја блокираа светската организација да признае палестинска држава.

„САД продолжуваат да тврдат дека најбрзиот пат до државност за палестинскиот народ е преку директни преговори со Израел и палестинската управа, со поддршка на САД и други партнери“, рече американскиот функционер,.

За прием на една земја во ОН, мора прво да добие позитивна препорака од Советот за безбедност (најмалку девет од 15 гласови за него, и без вето од која било постојана членка), а потоа да биде одобрена од Генералното собрание на ОН со двотретинско мнозинство. За да помине резолуцијата потребни беа најмалку девет гласа и без вето од САД, Велика Британија, Франција, Русија или Кина. 

„Одамна јасно ставивме до знаење дека предвремената акција во Њујорк, дури и ако е во најдобар интерес, нема да резултира со државност за палестинскиот народ“, рече американскиот претставник.

 Засилените напори на Палестина за полноправно членство доаѓаат шест месеци по масакрот од Хамас во јужен Израел и војната во Појасот Газа по започнувањето на израелската офанзива и проширувањето на еврејските населби на Западниот Брег.

Генералниот секретар на ОН, Антонио Гутереш, смета дека „повеќе од кога било потребно е да се поддржат напорите со добра волја за воспоставување траен мир меѓу Израел и независна, одржлива и суверена палестинска држава“.

Амбасадорот на Израел во ОН Гилад Ердан тврди дека Палестинците не ги исполнуваат критериумите за полноправно членство во ОН - постојано население, дефинирана територија, власт и капацитет за односи со други држави.

Давањето полноправно членство на Палестинците во ОН „нема да има никаков позитивен ефект за ниту една страна, тоа може да предизвика само уништување во наредните години и да им наштети на шансите за каков било дијалог во иднина, посочи Ердан.