Столтенберг бара од сите земји-членки на НАТО да формираат фонд од 100 милијарди евра за Украина

Добивај вести на Viber

Генералниот секретар на НАТО, Јенс Столтенберг, денеска на состанокот во Брисел на министрите за надворешни работи на земјите-членки,  ќе побара создавање фонд од 100 милијарди евра за пет години за помош на Украина во војната против Русија.

За ова објавија синоќа дипломатски извори, а ова ќе биде изнесено како предлог пред 32-те земји на Алијансата. На состанокот не се очекува одлука, но „разговорите за тоа ќе продолжат пред самитот на НАТО во Вашингтон во јули“, рекол неименуван функционер.

- Министрите „ќе разговараат за најдобриот начин да се организира поддршката на НАТО за Украина за да биде посилна, попредвидлива и поодржлива“, изјави неименуван претставник на Алијансата.

За финансирањето на тој фонд се уште се разговара, но идејата е секоја од земјите-членки на Алијансата да придонесе според својот бруто домашен производ (БДП).

- Сè што придонесува за динамиката на поддршката за Украина оди во вистинска насока, рече неименуван дипломат на НАТО, истакнувајќи дека идејата сè уште покренува многу прашања меѓу сојузниците, особено во однос на финансирањето.

Министрите, кои в четврток ќе ја прослават 75-годишнината од Атлантскиот сојуз, сакаат да разговараат и за начините за зајакнување на посветеноста на организацијата кон Украина, велат дипломатите.