2015, 2016 и 2017 најтопли години - каде ќе не однесе затоплувањето?

Добивај вести на Viber

Темпото на раст на температурите е „исклучителено“, предупредуваат од Обединетите нации.

Трите последни години се најтопли откако се мерат температурите на воздухот. 

„Сега е потврдено дека 2015, 2016 и 2017 се најтопли години кога било регистрирани и тоа јасно се вклопува во трендот на долгорочно затоплување, предизвикано од порастот на гасови кои предизвикуваат ефект на стаклена градина во атмосферата“- соопшти Светската метеоролошка организација, специјализирана агенција на ОН.

Најтопла од трите години била 2016 година со просечна температура повисока за 1,2 степени Целзиусови во споредба со прединсустриското време (референтен период од 1880 до 1990). Таа година беше под влијание на природниот феномен Ел Нињо, кој се појавува секои три до седум години и може да ја зголеми просечната температура, да влијае на струењата и на врнежите.

Директорот на Светската метеоролошка организација, Петери Талас вели дека поважно е да се набљудува долгорочниот развој на температурата, кој има тенденција на раст отколку да се врши класификација на годините. 

„Седумнаесет од 18 најтопли години се во 21 век и темпото на загравање што е констатирано во последните три години е исклучителчно. Затоплувањето посебно е видливо на Арктикот и тоа ќе има трајни последици на нивото на морето и на метеоролошките услови во други делови на светот“ - рече Талас.

Просечната температура во 2017 година е повисока за околу 0,46 степени Целзиусови од температурата измерена во периодот од 1981 до 2010 година.